بازدید امروز : 289
بازدید دیروز : 554
نه بیلیر؟
انسان اوغلو یالانچیا یار اولما
یالانچی لار صداقتی نه بیلیر ؟
یا دوست توتما یادا دوستو اونوتما
دوستو ساتان شرافتی نه بیلیر؟
عاقل انسان گؤردویوندن قازانار
بوگونون دوشونر صاباحین قانار
حیا مانع اولار انسان اوتانار
حیاسیزلار قباحتی نه بیلیر؟
فیکیرسیز دانیشان نه گلدی دئیه ر
خلقی آلچاق بیلر اؤزونو اؤیر
قوی یه دیننمز عاجزی دؤیر
قورخاق تولکو شجاعتی نه بیلیر؟
دده کاتیب درده درماندان دانیش
بیر درد بیلن بیرده لقماندان دانیش
سن عدالت پیشه سولطان دان دانیش
بیرتیجی قورد عدالتی نه بیلیر؟
یاردیم ائیله یاردانیم
عدالت لر سست اولاندا یاردیم ائیله یارادانیم
چوبان قوردا دوست اولاندا یاردین ائیله یاردانیم
نانجیب لر توخ اولاندا قاریشدیران چوخ اولاندا
باریشدیران یوخ اولاندا یاردیم اویله یاردانیم
قونشو قونشویا باخاندا جانین آتشه یاخاندا
آلچاق اوجایا چیخاندا یاردیم ائیله یارادانیم
دده کاتیب نار آلاندا ایش بیلن بئکار قالاندا
حق دانیشان خوار اولاندا یاردیم ائیله باردانیم
بیل لنر
بئش گون گن دونیایا دئییب گووه نن
گوللر سولوب سورولاندا بیل لنر
چوخلار دئیه ر منیم بوغدام دنلی دیر
خرمن دؤیوب سورولاندا بیل لنر
ظالم لرین سونو یامانه دؤنر
بوی-بوخون بوکولوب کمانه دؤنر
شاهلارا قالمایان زمانه دؤنر
هر نه ییندن آیریلاندا بیل لنر
الوان سویوناندا گئیه نده خامی
مزارین داشیندا یازیلار نامی
قبر سیخیب پوزولاندا اندامی
زخمی مار تک قیوریلاندا بیل لنر
دده کاتب هئچ وقت حقدن قاچماییب
اجل دویونونو لقمان آچمادی
بیر انسان کی یولو چؤلدن سئچمه دی
آتین قووب یورولاندا بیل لنر
قالین قافا
ده لی کؤنول سویوق دمیر دؤیمه ،سن
قالین قافا اؤیود آلماز تاققیلدار
گامیش دوغسا کیمسه سسین ائشیتمز
تویوق بیر یومورتا دوغسا قاققیلدار
قانع انسان هر وقت شاد خرام دی
حیاسیزا یولداش اولماق حرام دی
عالم انسان دلو قاب تک آرام دی
بوش کوزه لر سو دولاندا پاققیلدار
دئمه لی سؤز چوخدو هئچ چاتماز باشا
هرزه دیل لر یانیب یاپیشسین داشا
گوه زه لر نوبه وئرمز یولداشا
گوشک آغیز گله توتماز لاققیلدار
دده کاتیب ائل غمیندن یاتانماز
عؤمور بویو حقی دئسه اوسانماز
چوخ گولنلر فکر ائله مز اوتانماز
اؤسکوره کچی اوجا گولر قاققیلدار
زامان چرخی
قادر آللاه شهروالر الیندن
زامان چرخی زهرله ییب بادهمی
انسانلیق متاعی دام میدانیندا
شاشقیندی کروانیم بولمام جاده می
وار اؤرتوبدور عیب لرین اوستونو
پول برکیدیب نجابتین پوستونو
جهل باغلاییبدی علمین دستینی
ائله بیل کی ، میله چکیر دیده می
دیلیم قیسا سؤزوم چوخدو ساییلماز
بختیم قارا گئییب یاتیب آییلماز
ایش دوشمه سه یاخچی یامان تانینماز
آلچاق-اوجا تانیتدیرار آدامی
دده کاتیب هر آتشه آلیشمام
ناموس دوشمانیله هئچ وقت باریشمام
قانان انسان منی دؤیسه آجیشمام
قانمیانلار یاندیریبلاتر دده می
آپارار
سئلگاهلاردا بوستان اکمه گول واختیندا سئل آپارار
کیشی لیگین هیبتینی چوخ دانیشان دیل اپارار
معلول اولماز بلا علت غیرتسیزه جکمه غیرت
احسان اوسته قویسان منت ثوابینی یئل آپارار
اثر قویار سؤزون دوزو سکسنی،دوخسانی،یوزو
دوستا خایین باخان گؤزو سورمه باتار میل آپارار
دده کاتیب حقه اینان حق سؤزله رین ائیله بیان
قوجا کیشی آلسا جوان خرجی باتار ائل اپارار
گؤردوم
باهار چاغی چیخدیم یار اوولاغینا
یاشیل یایلالاری سارالی گؤردوم
یانیندئا کؤرپه نی امیر ممه سین
سورودن آیریلمیش مارالی گؤردوم
اووچونو گؤرنده او مارال چاشدی
کؤرپه نین دالینجا قاچدی نه قاچدی
کؤرپه نین آیاغی داشا دولاشدی
قان آخدی دیزیندن یارالی گؤدوم
اووچو ساقینمادی آه-نالادان
نه قضادان قورخدو نه ده بلادان
آتانی آییردی کؤپه بلادان
سالدی بیر-بیریندن آرالی گؤدوم
دده کاتیب مرددن جفا گؤرمه دیم
نامردین اوزوندن شفا گؤمه دیم
گزدیم انسانلاردان وفا گؤرمه دیم
گن دونیانی باشما دارالی گؤردوم
آللاه
اینسان اوغلو یوخسول لوغو وارلیغی
وئرن ده آللاه دیر آلان دا آللاه
عؤمره جاوانلیغی سوندا پیرلیگی
وئرن ده آللاه دیر آلان دا آللاه
یارادیب یئر-گؤیو ، آیی ، اولدوزو
قارانلیق گئجه نین واردی گوندوزو
حکمت ائیله بؤلوب عالمه روزی
وئرن ده آللاه دیر آلان دا آللاه
توکل اللهی اولسا بیر کسین
اؤلونجه مننتین چکمز ناکسین
آلدیغین، وئردیگین هردم نفسین
وئرن ده آللاه دیر آلان دا آللاه
دده کاتیب دوغرو بیل یارادانی
یارادیب اونوتماز هئچ بیر اینسانی
سنده کی، منده کی او شیرین جانی
وئرن ده آللاه دیر آلان دا آللاه .
ایکی
انسان اوغلو آللاه اوچون دوست اولان
ایکی کؤنول ایکی جسد ایکی دیل
عاشیق له ره چوخ چتین دیر آیریلیق
ایکی لاله ایکی سوین ایکی هل
گؤزل کهلیک قایالاردا سس لنر
سینا عشقه گلر طور هوس لنر
آلیجی قوش اوجا اوچار حریص لنر
ایکی ترلان ایکی سونا ایکی گؤل
عشق اهلینین سیرری دوشر دیل لره
گؤز یاسلاری آخار دؤنر سئل لره
یاز آیلاری ژاله دوشر گول لره
ایکی بالاق ایکی دوداق ایکی گول
دده شاعر دوز قدّینی اگنده
قئیس تکین دونون قارا گئیه نده
سحر یئلی گولوستانه دگنده
ایکی یاندا ایکی شانه ایکی تئل .
خاص آل خاص
ده لی کؤنول خاص سؤزله ری خاص دانیش
خاص دیله گین خاص آللاهدان خاص آل خاص
خاص قئییس تک خاص داغلاردا خاص چالیش
خاص لیلادان خاص ایسته گین خاص آل خاص
خاص سس گلدی خاص ائشیتدی خاص سینا
خاص خائنین خاص خاص گردنی خاص سینا
خاص گوجونله خاص ایشله ری خاص سینا
خاص اوستاددان خاص درسینی خاص آل خاص
خاص گونونده خاص سؤزون دیء خاص ائیله
خاص سؤیله سن خاص آنلا سن خاص ائیله
خاص عاشیقسن خاص کناره خاص گوله
خاص ساقیدن خاص کاسه نی خاص آل خاص
دده شاعر خاص دانیشا خاص گوله
خاص آغلییا خاص گؤز یاشین خاص سیله
خاص آللاهین خاص آدینی خاص دیله
خاص دریادان خاص شکارین خاص آل خاص
آلدی درد منی
مدد آللاه مدد دردین الیندن
چوخدان مشتری ایدی آلدی درد منی
حسرت اولوب خیالینا یاندیغیم
جنون ائدیب چؤله سالدی درد منی
درد اهلی دیر دردلی لردن خبردار
درد چکنلر بیلر دردده نه لر وار
دردین بیر قیلینجی واردیر جوهردار
ووردو اوره گیمده بؤلدو درد منی
عؤمروم باهار ایدی قار آلدی منی
بولبوب لاوچدو حئییف خار آلدی منی
فالیم قارا گلدی زار آلدی منی
توکنمز خیالا سالدی درد منی
کاتیب آه چکرسن فایدا بولانماز
عؤمور تمام اولسا کیمسه قالینماز
یئر سالیبدی بو درد مندن آلینماز
سکسان حالدان حالا سالدی درد منی
سئودیگیم
محبتین اویکوسوندا اویمامیش اومار سئودیگیم
ککلیک کیمی کایالاردا چوخ گزمه کنار سئودیگیم
یادلار کیمی یانا باکاما باغریمی آتشه یاکما
کؤنلوم ائوین پوزوب ییکما اولما کانی کار سئودیگیم
بن سئومیشم سنین آدین عاشیق بیلر عشقین دادین
شو حاستا کؤنلوم مرادین همت اویله وئر سئودیگیم
عاشکین دنیزیندن بویلا مجنون جانین یاکدی لیلا
کاتیبامیاندیم واویلا بیر حالیمی سور سئودیگیم
یالان دیر
کؤنول نفسین اؤلدورمه میش ریاضت ده یالان دیر
حرام مالدان احسان اولماز سخاوت ده یالان دیر
بیر اینسانین اؤزنفسینده گر لیاقت اولماسا
دده-بابا سولطان اولسا نجابت ده یالان دیر
کیچیک لره تعلیم ائیله بؤیوک لره احترام
یوخسوللارین حالین یوخلا دوشگونلره وئر سلام
یارادانا قوللوق ائله ، خلقه خدمت والسلام
اگر قصدین شهرت اولسا او خدمت ده یالان دیر
بیر آی اوروج ،بئش واخت ناماز، الده تسبیح سجاده
گئجه-گوندوز ذکر ائده سن حاجا گئدسن پیاده
شیطانا یوز داش آتاسان قوربان کسه سن میناده
کؤنلونده بیر رحم اولماسا عبادت ده یالان دیر
دده کاتیب دورما چالیش نه قدر وار اختیار
ایشله، قازان بویون اگمه،ایش دیر سنه افتیخار
گرچی زرق مقدردیر آما حرف آشکار
چالیشماسان روزی یئتمز او قسمت ده یالان دیر
فکری ناقص
دونیا بیر کؤلگه یه بنزر گون دؤننده زایل اولو
عقل-فکیری ناقص انسان دونیایا چوخ مایل اولو
دونیا بیر یوخودور اینان یاتیب رؤیا گؤرور اینسان
عیش-عشرت،سفره الوان آییلاندا باطل اولو
دونیا امتحان یئری دیر هر کسه مهمان یئری دیر
بیر گئجه کاروان یئری دیر صاباح اولجاق راحل اولو
دده کاتیب اویما، آیین فرصت گئتمه میش آل پایین
اندازه بیل قاتما سایین انسان اوغلو عاقل اولو
لیست کل یادداشت های این وبلاگ
لوگوی دوستان
درباره خودم
پیوندهای روزانه
فهرست موضوعی یادداشت ها
بایگانی
اشتراک
